Hlaðvarpið ÞROTKAST skoðar grannt hin ýmsu brotabrot af Þroti, fyrstu kvikmynd Heimis Bjarnasonar í fullri lengd og indí-verk sem á sér enga baksögu líka. Í þriggja hluta örvarpsseríu er fókusinn stilltur á bak við tjöldin og víðar í tengslum við afrakstur Heimis og hans teymis.

Í þriðja og síðasta þætti Þrotkastsins er loksins farið af öllu afli í spoiler-umræður, viðbrögð og uppruna þessarar indí-myndar Heimis Bjarnasonar, múltítaskarans sem eyddi góðum sjö árum í að sjá einn af stærri draumum sínum verða að veruleika. En það gerðist ekki að sjálfu sér eða átakalaust.

Við fáum að kynnast aðeins veröld Heimis; þar sem uppvaxtarár, kvikmyndauppeldi, óséðu en stórvinsælu fagverk mannsins í gegnum ferilinn, fjölskyldumynstur og ýmsar skrýtnar tilviljanir bregða fyrir í hressilega einlægri spjallstund, ásamt vissulega alls konar krufningum; þá ekki síst um þá gefandi martröð sem það var að framleiða Þrot. 

Hefst nú gamansama alvaran um allt á milli Heimis og jarðar.